About Anawrahtar Foundation

အနော်ရထာဖောင်ဒေးရှင်း (The Anawrahta Foundation) သည် အကျိုးအမြတ်မယူသော ဗုဒ္ဓဘာသာအဖွဲ့အစည်းတစ်ခု ဖြစ်ပါသည်။ ယေဘုယျအားဖြင့် ဤအဖွဲ့အစည်း၏ ရည်ရွယ်ချက်မှာ နောင်လာမည့် ထောင်စုနှစ်များစွာတိုင်အောင် လူသားအားလုံး၏ အကျိုးစီးပွားအတွက် ဗုဒ္ဓမြတ်စွာဘုရား၏ အဆုံးအမတရားတော်များကို ပြန့်ပွားထွန်းကားစေရန်နှင့် ထိန်းသိမ်းစောင့်ရှောက်ရန် ဖြစ်ပါသည်။ ဗုဒ္ဓမြတ်စွာဘုရား၏ အဆုံးအမတရားတော်များသည် လူမျိုး၊ နိုင်ငံ၊ ဘာသာ သို့မဟုတ် ယုံကြည်ချက် ကွဲပြားမှုမရှိဘဲ လူသားအားလုံးအတွက် လက်တွေ့ကျကျ အသုံးချနိုင်သည်ဟု ကျွန်ုပ်တို့ အပြည့်အဝ ယုံကြည်ပါသည်။ ထို့ကြောင့် ဤအဖိုးထိုက်တန်လှသော တရားတော်များသည် တစ်ကမ္ဘာလုံးတွင် စစ်မှန်သော ငြိမ်းချမ်းရေးနှင့် ပျော်ရွှင်မှုကို ရရှိစေမည့် လမ်းစဉ်ဖြစ်ပါသည်။ ဤအဖိုးမဖြတ်နိုင်သော တရားတော်များကို ပြန့်ပွားစေရန် ကြိုးပမ်းရာတွင် ဤအဖွဲ့အစည်းသည် အထူးသဖြင့် မြန်မာနိုင်ငံရှိ မျိုးဆက်သစ် ရဟန်းသံဃာတော်များနှင့် သာမဏေများကို ဗုဒ္ဓဒဿန၊ ပိဋကတ်စာပေများသာမက ခေတ်မှီ အခြေခံပညာရေးစနစ်များကိုပါ သင်ကြားလေ့ကျင့်ပေးရန် ကြိုးပမ်းဆောင်ရွက်လျက် ရှိပါသည်။ အဖွဲ့အစည်း၏ ထိပ်တန်းခေါင်းဆောင်များသည် သဘောထားကြီးမြတ်ပြီး အကြားအမြင်ဗဟုသုတ ကြွယ်ဝကာ ဗုဒ္ဓသာသနာတော်အတွက် လုံးလုံးလျားလျား အနစ်နာခံ ဆောင်ရွက်နေကြသော ပညာရှိသံဃာတော်များ ဖြစ်ကြပါသည်။ ၎င်းတို့သည် သာသနာတော်က လူသားမျိုးနွယ်၏ နီးကပ်သော အနာဂတ်နှင့် ရေရှည်အနာဂတ်အပေါ် ကောင်းကျိုးသက်ရောက်နိုင်မည့် အလားအလာများကို ပြတ်သားသော မျှော်မှန်းချက်များဖြင့် သိမြင်တော်မူကြပါသည်။ ထို့ကြောင့် ဤအဖွဲ့အစည်းအတွင်းရှိ နောက်လိုက်များနှင့် အဖွဲ့ဝင်များသည် ၎င်းခေါင်းဆောင် ဆရာတော်ကြီးများအပေါ် သက်ဝင်ယုံကြည်စွာ လိုက်နာဆောင်ရွက်ကြသည့် တပည့်သားများ ဖြစ်ကြပါသည်။

အနော်ရထာဖောင်ဒေးရှင်းကို အောက်ပါ မဟာဗျူဟာ (၃) ရပ်ကို ချမှတ်ပြီး ၂၀၁၇ ခုနှစ်၊ ဇူလိုင်လ (၁) ရက်နေ့တွင် ကျောက်ဆည်မြို့နယ်၊ အင်းကုန်းကျေးရွာ၌ စတင်တည်ထောင်ခဲ့ပါသည်။

(၁) အနော်ရထာ ရွှေရင်သွေး သာမဏေကျော်ကျောင်း စီမံကိန်း (၂) ဗုဒ္ဓဒဿနတရားတော်များကို စနစ်တကျ သင်ကြားခြင်းနှင့် သင်ယူခြင်းလုပ်ငန်းစဉ်များ စဉ်ဆက်မပြတ် တည်တံ့စေရန် သင်ကြားပေးသော ဆရာတော်များနှင့် သင်ယူနေသော သံဃာတော်၊ သာမဏေများကို အစဉ်တစိုက် ထောက်ပံ့ကူညီပေးမည့် စီမံကိန်း (၃) အနော်ရထာ ခေါင်းဆောင်မှုတက္ကသိုလ် (The Anawrahta Leadership University) စီမံကိန်း

ကျွန်ုပ်တို့အဖွဲ့အစည်း၏ ကနဦးမျှော်မှန်းထားသော အနာဂတ်ပန်းတိုင်မှာ ချမှတ်ထားသော အဓိကမဟာဗျူဟာ (၃) ရပ်နှင့်အညီ အဓိကစီမံကိန်းကြီး (၃) ခုကို အကောင်အထည်ဖော်ဆောင်ရွက်ရန် ဖြစ်ပါသည်။ လာမည့် (၁၀) နှစ်တာကာလအတွင်း အောက်ပါလုပ်ငန်းစဉ်များကို ပြီးမြောက်အောင် ဆောင်ရွက်ရန် ရည်မှန်းထားပါသည် –

(၁) ပညာရေးနှင့် ခေါင်းဆောင်မှုကဏ္ဍများတွင် သာမဏေအပါး ၁,၀၀၀ ကို သင်ကြားလေ့ကျင့်ပေးမည့် စီမံကိန်းကို အကောင်အထည်ဖော်ရန်။ (၂) ဗုဒ္ဓစာပေပညာရပ်များကို လေ့လာဆည်းပူးနေကြသော ရဟန်းသံဃာတော်များ၊ သာမဏေများနှင့် သင်ကြားပြသပေးနေသော ဆရာတော် စုစုပေါင်း အပါး ၁၀,၀၀၀ ကို ထောက်ပံ့ကူညီပေးမည့် စီမံကိန်းကို ဆောင်ရွက်ရန်။ (၃) လိုအပ်သော အဆောက်အအုံနှင့် အင်္ဂါရပ်များ ပြည့်စုံစွာပါဝင်ပြီး လက်တွေ့အသုံးချနိုင်မည့် ခေါင်းဆောင်မှုတက္ကသိုလ် (Leadership University) စီမံကိန်းကို အပြီးသတ်တည်ဆောက်ရန်တို့ ဖြစ်ပါသည်။

အနော်ရထာဖောင်ဒေးရှင်း၏ စီမံကိန်းများ

(၁) အနော်ရထာ ရွှေရင်သွေး သာမဏေကျော်ကျောင်း စီမံကိန်းကို ၂၀၂၁ ခုနှစ်တွင် အင်းကုန်းကျေးရွာ၌ စတင်အကောင်အထည်ဖော်ခဲ့ပါသည်။ ဤစီမံကိန်း၏ အဓိကရည်ရွယ်ချက်မှာ သံဃာဦးရေ လျော့နည်းလာခြင်းနှင့် ရဟန်းသံဃာတော်များ ရှားပါးလာခြင်းဟူသော ပြဿနာကို စတင်ဖြေရှင်းရန် ဖြစ်ပါသည်။

ရွှေရင်သွေး သာမဏေကျော်ကျောင်းသည် မိဘများကို စည်းရုံးကာ ၎င်းတို့၏ သားရတနာများကို သာမဏေအဖြစ် ဝတ်ပြုစေပြီး ဗုဒ္ဓတရားတော်များသာမက မြန်မာ့လူမှုယဉ်ကျေးမှု ဓလေ့ထုံးတမ်းများကို မစွန့်လွှတ်ဘဲ ခေတ်မှီပညာရေး ဘာသာရပ်များကိုပါ သင်ယူစေပါသည်။ မိဘများကိုယ်တိုင်ကလည်း မိမိတို့၏ သားငယ်များကို မြတ်နိုးဖွယ်ရာ ပညာတတ်လူသားများအဖြစ် တောက်ပသော အနာဂတ်ကို ပိုင်ဆိုင်စေလိုသည့် သဒ္ဓါတရားထက်သန်သော ဗုဒ္ဓဘာသာဝင်များ ဖြစ်ကြသောကြောင့် ဤဗျူဟာမှာ များစွာထိရောက်မှုရှိကြောင်း တွေ့ရှိရပါသည်။

လွန်ခဲ့သော (၃) နှစ်အတွင်း ရွှေရင်သွေး သာမဏေကျော်ကျောင်းတွင် ဗုဒ္ဓစာပေနှင့် ခေတ်မှီပညာရေးတို့ကို သာမဏေအပါး ၁၆၀ ကို စနစ်တကျ သင်ကြားပေးလျက်ရှိပါသည်။ လာမည့် (၁၀) နှစ်အတွင်း ဤကျောင်းမှ သာမဏေအပါး ၁,၀၀၀ အထိ သင်ကြားလေ့ကျင့်ပေးနိုင်ရန် ယခုအခါ လျာထားဆောင်ရွက်လျက် ရှိပါသည်။

(၂) ဗုဒ္ဓဒဿနတရားတော်များကို စနစ်တကျ သင်ကြားခြင်းနှင့် သင်ယူခြင်းလုပ်ငန်းစဉ်များ စဉ်ဆက်မပြတ် တည်တံ့စေရန် သင်ကြားပေးသော ဆရာတော်များနှင့် သင်ယူနေသော သံဃာတော်၊ သာမဏေများကို အစဉ်တစိုက် ထောက်ပံ့ကူညီပေးမည့် စီမံကိန်း။

ဤစီမံကိန်းကို ၂၀၁၉ ခုနှစ်တွင် စတင်အကောင်အထည်ဖော်ခဲ့ပါသည်။ ၂၀၁၉ ခုနှစ်၊ နိုဝင်ဘာလ ၂၆ ရက်နေ့တွင် မန္တလေးမြို့၌ ကျင်းပပြုလုပ်ခဲ့သော ခမ်းနားထည်ဝါသည့် လှူဒါန်းပွဲအခမ်းအနားတွင် အနော်ရထာဖောင်ဒေးရှင်းမှ သံဃာတော်နှင့် သာမဏေ စုစုပေါင်း အပါး ၃၀၀ အတွက် ငွေကျပ် ၃၆ သန်းကို ဆက်ကပ်လှူဒါန်းခဲ့ပါသည်။ ဤစီမံကိန်း၏ ရည်ရွယ်ချက်မှာ လက်ရှိ ဗုဒ္ဓစာပေပညာရပ်များကို လေ့လာဆည်းပူးနေကြသော သံဃာတော်နှင့် သာမဏေများကို ဆက်လက်ထိန်းသိမ်းစောင့်ရှောက်ရန်နှင့် ၎င်းတို့၏ သင်ကြားသင်ယူမှုစွမ်းရည်များကို မြှင့်တင်ပေးရန် ဖြစ်ပါသည်။

ယနေ့အထိ မြို့အသီးသီးတွင် အလားတူ ခမ်းနားသော လှူဒါန်းပွဲအခမ်းအနား (၁၀) ကြိမ်တိုင်အောင် ကျင်းပပြုလုပ်ခဲ့ပြီးဖြစ်ကာ စုစုပေါင်း သံဃာတော်နှင့် သာမဏေ အပါး ၁,၃၀၀ ကို လှူဒါန်းခဲ့ပြီး ဖြစ်ပါသည်။ ဤစီမံကိန်း၏ အကျိုးရလဒ်များကို ဆက်လက်တွေ့မြင်ရဦးမည် ဖြစ်ပါသည်။ လာမည့် (၁၀) နှစ်တာကာလအတွင်း သံဃာတော်နှင့် သာမဏေ အပါး ၁၀,၀၀၀ ကို ထောက်ပံ့ကူညီပေးနိုင်ရန် ကျွန်ုပ်တို့ မျှော်လင့်ထားပါသည်။

(၃) အနော်ရထာ ခေါင်းဆောင်မှုတက္ကသိုလ် (Anawrahta Leadership University) စီမံကိန်းသည် ၂၀၁၇ ခုနှစ်တွင် အနော်ရထာ ခေါင်းဆောင်မှုအကယ်ဒမီ (Anawrahta Leadership Academy) ကို စတင်ဖွဲ့စည်းခဲ့ရာမှ မြစ်ဖျားခံလာခြင်း ဖြစ်ပါသည်။ ထိုအချိန်မှ ယနေ့အထိ ခေါင်းဆောင်မှုသင်တန်းပေါင်း (၁၃) ခုကို ဖွင့်လှစ်ခဲ့ပြီး ကျောင်းထိုင်ဆရာတော်များအပါအဝင် ဘွဲ့ရအရည်အချင်းရှိသည့် နောင်တစ်ချိန်တွင် ကျောင်းထိုင်ဖြစ်လာမည့် ရဟန်းသံဃာတော် စုစုပေါင်း အပါး ၈၀၀ ကို ပြုစုပျိုးထောင်ပေးနိုင်ခဲ့ပါသည်။

အမှန်စင်စစ်အားဖြင့် ဤခေါင်းဆောင်မှုအကယ်ဒမီသည် နောင်တစ်ချိန်တွင် ဗုဒ္ဓသာသနာတော် တည်တံ့ပြန့်ပွားစေရန်အတွက် သံဃာတော်များ၏ ခေါင်းဆောင်မှုစွမ်းရည်ကို ပိုမိုမြှင့်တင်ရန်နှင့် အနစ်နာခံဆောင်ရွက်မည့် အရည်အသွေးမြင့် ရဟန်းသာမဏေများကို ပြုစုပျိုးထောင်ပေးရန် ရည်ရွယ်သည့် ခေါင်းဆောင်မှုတက္ကသိုလ်၏ ရှေ့ပြေးနိမိတ်ပင် ဖြစ်ပါသည်။ တက္ကသိုလ်အဆောက်အအုံ တည်ဆောက်ရေးလုပ်ငန်းများကို (၁၀) နှစ်အတွင်း အပြီးသတ်ရန် ရည်မှန်းထားပါသည်။ ဤတက္ကသိုလ်သည် ဗုဒ္ဓသာသနာတော် ပြန့်ပွားရေးအတွက် ဦးဆောင်နိုင်မည့် ထူးချွန်ထက်မြက်သော မျိုးဆက်သစ် ရဟန်းသာမဏေများကို ပြုစုပျိုးထောင်ပေးနိုင်မည့် အရည်အသွေးမြင့် ခေါင်းဆောင်သံဃာတော်အမြောက်အမြားကို မွေးထုတ်ပေးသွားမည် ဖြစ်ပါသည်။